Lewlewal Group Networks (LGN) ||| kabaruuji Fuuta e Winndere |||
| Almuudo Ngay: Nawliigu Hammee Lih, so celluka humii-humtii dewgal |
Hammee Aaamadu Lih, gooto jokollo jontaaɗo 2STƁ mo ngannduɗon, gorko mo Mbooyo noddi min kumal naange e hoore kellew e yeeso seernaabe e naalaŋkooɓe to leegal HLM Grand Yoff. Hakkunde ganiilaaji e paɗe mukke, huunde ko in a holɓa tan; diryankooɓe in a nguura baŋ yoo baŋ, saƴar maƴar in a yeewta noppi haa hay so a muumniima tn cikkataa ngonɗaa ko aljinnatun minal nawmi. Awluɓe e ask mum en, maccuɓe e baraaɗi mum en, sagataaɓe e seemeɗɓe e jeewte paayodinɗe haa alaasaraa nde ceerno Ahmadu Nalla Caam fiɓi dewgal. Ɗo ceerno gayni e fiɓde ɗoo suwaa hay duwo tan, Ko ɗoon Hammee diwi haa dow ɗo o ferlinoo tan o wulli e dow ceerno: "aan naafige oo, ko aan humnoo, humtu haa laaɓa cerr gila mi jiibaani mi nawor maa." ko ɗoon tan jooɗnde jiiɓii, seernaaɓe ndaarondiri, jokolɓe njeeƴondiri, awluɓe ndokki geenol, maccuɓe poti e baraaɗi darɗe….. ndeke Jeewo Hammee ko ko naati dingiral galle oo etee kanko nih hay huunde heen o tinaano haa ɗo. O arnoo ko sabu a nanii sehil makko debbo ina humanee kono hay gooto wiyaani mo ko Hammee Bajjel humantee. Ko ɗoon jeewo Hammee woni e wiyde: "hol ko adii kumee e kumtee ne?" Hammee jaabii: "anndi a waawaa celluka dey; kumee e kumtee ko alkulal gootal seerndi ɗum, so a diwii "t" oo tan a juumat. Ngal ceernal toorodal tekangal teko muumo janngaani celluka nana jiiɓindira kumee e kumtee. Miin, gila ɗum humaaka, mbiymi ko "kumtee haa baaji keddoo". Wonat, wonataa… ko noon woori haa ceerno kumnooɗo ñummbilaa haa ɗiggi, aan'di e hoore mum haa haɓɓiti ko haɓɓunoo….. Hammee regginiraa paɗe mum haa galle omo yooɓii yahde e wiyde : "wollaahi ko alkulal t ngal o jiiɓi kono mi haaliino celluka weeɓaani". Mo wayri yiyde wolla nan'de fiyaaku Hammee fof yoo neldu mo duwaaw sabu jeewo oo ko ko hesɗitini dammbordu makko: mbela ko e sago mako o woni wolla ko o kippaaɗo o mo fiyee, min nganndaa. Miin ne ngay mi yiyii kesol, juutde balɗe haa seedoo jamaa kanu e konukanu fof e nder hojomaaji jeenayi…. buleet nawliigu Hammee Lih. Wota Alla waram haa mi annda ɗo o waɗtindi….kono jooni woni caɗeele ɗe ko heɓtude kameraaji 2stɓ ɗiɗi keddiiɗi to kumal to. Kala kawruɗo e kameraa ina waɗi natal 2STV, yoo tiiɗno nodda Hammee e tonngoode (vingt-dix, trente-dix, cinquante-vingt-dix). Binndol Almuudo Ngay, mo kesi mum kaɗi kiiɗɗi mum haaleede, gorel ɗaɓɓel toowngel wulaango, lappotaako woppotaako, alaa teew saka ƴiiƴam. Mo mettini binndol am fof yoo meɓɓo newre ñamako, yartoo baagal odesawel (eau de javel). *Sabu won’de mo aawase e borijoŋ mo yahataa ko woni haaju mum, Lewlewal Group Networks ina moolanii Ngay alla etee defaaki kesi mum saka kiiɗɗi mum hay seeɗa. Lewlewal Group Networks ina yetta yillotooɓe mbiimi.com. Miijooji mon e binndanɗe ɗe ina walla min wuurtude golle e coklaandi renndo ngoo. Tiiɗnoɗen e hokkude miijooji men e dow needi, hakkilantaagal e muñal jahdungal e yiɗde ɓamtude golle men.
Comments (5)
Joomla components by Compojoom
|
LGN
ndou sawru ko hameth yoftatoo hore mun