LGN 10/05 Ñiiɓirde fedde gollotoonde e ndeelelam (peterol e isaas) hono SAR sumii e oo alarba subaka. Hay so wonii hay gooto gaañaaki heen nde tawnoo ñippooɓe njaawii faabaade, gollorɗe keewɗe kam mbonii heen.

LGN 08/05/12 Goomu toppitiiɗo weeyo Senegaal (meteo ANAMS) hollitii ɗee balɗe mbooyu (nguli mawki njahduki e henndu wulndu) maa wuttu e falnde Podoor-Maatam haa yettoo Bakkel. E haala maɓɓe, hay mbunndi Senegaal haa yiy hono oon mbooyu haa arti e diiwaan Linngeer-Jurbel haa yettoyoo Tammbaa.

Oo alarba e alkemes maa wul jaw e falnde Podoor, Maatam Bakkel haa yettii Linngeer, Jurbel e Tammbaa. E ko goomu weeyo Senegaal saakti, nguli ki maa yetoo 44 haa 45 degeree e les ɓuuɓiri haalaaka e les caaafal naange.

03/12 Caggal balɗe 15 ko Maalik Nowel Sek nannganoo ñalnde 5 o heɓii wellitaare nde duumaaki tawo sabu hoybinaama o yiyi boowal hade makko ñaaweede ñande 13 mars

E siftinde Maalik nannganoo ko e ruumo suɓngooji hooreejo leydi e daawal gadanal ngal. O nanngiranoo ko won njogitaaje tawanoo e mobel makko ko wayno laɓɓe jaasiiji, cabbi… E oon sahaa noon awokaa makko ñaaginooma yoo woppite haa ɓe ngasna loskito ngo ɓe mbaɗata ko feewti e majjum kono ñaawooɓe ɓee njaɓaano. Hannde noon o woppitaama tawii hay ɗaɓɓaande wootere waɗaaka

Abuu GAY

LGN 06/01 Yuusu Nduur woniino jaalal (ambassadeur) Unicef e nder rogere mum aarde hakkeeji cukaagu e wellitaare mumen. Unicef, sabu mum yiyde juqngo Yuusu Nduur e nder dawrugol Senegal fellitii yaafaade ɗum e golle mum to Unicef.

E tuugnaade e sakto kabaruuji ngo fedde adunayankoore ngam wellitaare e aarde hakkeeji sukaaɓe yaltini, Yuusuu nattii jogaade tiitoonde ambassadeer UNICEF sabu makko laataade dawriyanke.

E ciftoor, Yuusu Nduur fellitii gila ñande 2 janɓier dikkaade lefol laamu Senegaal.

LGN 08/01 Demmba Jah mo Rock Mbalaƴ ina weeji e ɗee balɗe; sabaabu ndeen weejeende ko diiso (plainte) ngo jipporde Hotel Ambassade Suites waɗi e makko to polis Parcelles. E ko ardiiɓe hotel oo kolli, Demmba Jah ina joganii ɓe 2,8 milliyoq cfa sabu makko huutoraade cuuɗi maɓɓe, kaqko e suka makko debbo liggotooɗo to RFM/TFM.

Ngoo diiso noon waɗii dille mawɗe sabu heewɓe tuumiino oon suka debbo ko Ñatam Bah, kono tawaama ko Faatim O. Ko haawnii ko, Faatiim yeeyniino won’de o meeɗaani anndondirde e Demmba. Ɗuum laatiima fenaande sabu polis Parcelles hollitii won’de ko kaqko tigi wonndunoo toon e Demmba.

LGN 24/11 Huunde e ardiiɓe gure to Welingaraa Ferloo mbaɗii e oo talaata 22 nowamburu seppo. Ummini seppo ngoo e wiyde maɓɓe ko cukko perefee Welingaraa biyeteeɗo Seek Anta Jeŋ waɗtii suɓanaade hoore mum ardotooɓe gure.

Talaata e nder Welingaraa Ferlo ko ñalawma duggere. Gulaali e luukaali yeeyooɓe naattii e dille ardiiɓe gure yuɓɓinɓe seppo. Seppo ngoo noon waɗi ɓe yuɓɓin'de ɗum e no ɓe kaaldi ko ŋaafte ɗe Seek Anta Jeŋ, cukko  perefee oo waɗti ŋaaftude ardiiɓe gure  ɓee, ina fiila ɓee, ina fiilta ɓeya e dow ko luutndi aadaaji maɓɓe. Gila 1940 nde nokku oo waɗetee cukko perefee, ko ɓeen ngonnoo ɗo, ndeen nih tawa Welingaraa ina jeyaa e diiwaan Luga.